Палац Пузынаў

Сядзібе старадаўняга роду Пузынаў, размешчанай на паўночнай ускраіне вёскі Грымяча, больш за 400 гадоў. Ансамбль сядзібы складаецца з каменнага палаца, пабудаванага ў сярэдзіне XIX стагоддзя, невялікага пейзажнага парку і каменных гаспадарчых пабудоў. Аб'ект знаходзіцца ў дзяржаўным спісе гісторыка-культурнай спадчыны, але ўжо больш за 30 гадоў комплекс «Грымяча» трухлее і паступова прыходзіць у заняпад. Старажылы ўпэўненыя, што прычына гэтага – ва ўласніках: з канца 90-х яны мяняліся ўжо чатыры разы, але сродкаў на рэстаўрацыю ў выніку ні ў кога не знаходзілася.

Каля года назад у комплекса «Грымяча» з'явіўся гаспадар: гісторыка-культурны аб'ект набыла брэсцкая фірма. Але распачынаць рэстаўрацыйныя працы прадпрымальнікі чамусьці не спяшаюцца.

Калі ў жніўні 2010 года мы наведвалі сядзібу, мясцовыя жыхары сустрэлі нас сумнымі навінамі: казалі, зусім нядаўна ў сядзібе ў выніку разбурэння перакрыццяў загінуў пад заваламі цікаўны вандроўнік. Дзверы і вокны сядзібы забілі. Не ведаю, магчыма, гэта і хлусня была, каб кожны жадаючы ў сядзібу не лазіў, але чамусьці пасля такой гісторыі мне аглядаць унутранае ўбранства палаца і падвяргаць сваё жыццё небяспеке расхацелася…