Ці можа яшчэ зьдзівіць Metallica?
Апублікавана
у
Рэцэнзіі
Ва ўсім сьвеце было выпушчана няшмат цікавых, а тым больш захапляльных і нетыповых рок/метал фільмаў, кожны зь якіх быў бы прысьвечаны таму ці іншаму гурту, і самім жа гуртом зроблены. На думку прыходзяць толькі The Wall Флойдаў ды Imaginaerum ад Найтаў. Канешне, можна ўзгадаць наркаманскае і раздаўбайскае тварэньне гурта Kiss пад назвай Detroit — Rock City, але на ім сьпіс і заканчваецца. У гэты кароткі радок ірвецца Мятла са сваёй поўнаметражкай Through The Never. А ці мае шанец гэты фільм таксама стаць нечым большым за вельмі добры і якасны live-DVD? Вось гэта я і паспрабую высьвятліць для сябе…Па-першае, у мяне не было ніякіх ілюзіяў наконт лёса гэтага фільма ў нашай краіне, я быў упэўнены, што яго тут ніхто не пакажа. Калі я правільна памятаю, кінатэатр Кіеў намагаўся паказаць новы рэліз Metallica менскім гледачам, але не зраслося. Неяк усё не было часу спампаваць ды ацаніць гэты прэтэнзійны твор. Неяк блукаючы па Інтэрнэце я патрапіў на афішу TNT Rock Club і ўбачыў, што яны ладзяць бясплатны паказ. Гэта была адзіная магчымасьць убачыць фільм на хоць якім-небудзь вялікім экране, таму вырашаць тут не было чаго. Экран сапраўды апынуўся не маленькім, ну і гук у клубе быў ня горшы, чым у сярэднім кінатэатры, сама атмасфера месца вельмі спрыяла прагляду.
Фільм пачаўся мабыць неяк камедыйна, але потым стала зразумела, што гэтае кіно пра адну з самых пасьпяховых метал-камандаў сьвету. Твор уяўляе сабой сумесь гульнявога кіно ды live-канцэрта гурта. Малады тэхнік фармацыі, адрываючыся на імпрэзе, нечакана атрымлівае тэрміновае заданьне забраць і прывезьці таямнічую сумку для Hetfield&Co, вось тут і пачынаюцца неспадзяванасьці разам з поўным трэшам ды ўгарам у прамым сэнсе слова. Больш расказваць ня буду, каб не сапсаваць ваш уласны прагляд.Зьнята ўсё проста шэдэўральна, сам канцэрт пададзены, як лепшае шоў гурта і ўсяго жанра метал цалкам. Ну і элементы кіно таксама на вельмі высокім ўзроўні. Толькі вось успрымаецца ўсё гэта, як адзін вялікі і афігіцельны кліп, такого яшчэ не рабіў ніхто. Усё ж такі сцэны канцэртнага выступу пераважаюць над гульнявым кіно, ці блага гэта альбо не, вырашаць толькі гледачу. Мне здалося, што можна было б аддаць болей часу і увагі выпрабаваньням тэхніка гурта, чым канцэрту саміх музыкаў. Мабыць гэта адзіны недахоп фільма, разам са скарацечнасьцю, вось толькі была песьня Hit The Lights і ўжо пайшлі цітры.
Дзякуй гурту, за моцны і вельмі эмацыйны рэліз, было відаць, што музыкі уклалі душу ў сваю працу! Дзякуй, што нарэшце, за многія гады парадавалі нечым новым, а не сапсавалі настрой! Дзякуй TNT Rock Club за магчымасьць паглядзець Metallica: Through The Never! Для тых, хто не глядзеў, ці не вырашыў, ці варты фільм прагляду, я адкажу і параю абавязкова зь ім азнаёміцца. Хай ты і не фанат Мятлы і ўвогуле ня вельмі і слухаеш іх песьні, проста паглядзі кіно, якое некалі мабыць стане культавым, канешне, калі ты маеш нейкае дачыненьне да рок/метал культуры.
Увогуле, TNT Rock Club хоць раз на тыдзень паказвае тэматычныя фільмы і канцэрты. Звычайна ўваход на іх вольны, таму сачыце за афішай клуба і глядзіце ўлюблёныя мастацкія фільмы і канцэрты на вялікім экране з файным гукам!
Сяргей Бохан (Rocker)
3 каментара