avatar

HELLEBAARD – Fier (2009)
Апублікавана у Рэцэнзіі


Gardarika Musikk
8 tks. / 46 min.

Tracklist:
1. Hellebaard
2. Vleugels Van Vuur
3. Bloedbroeders
4. De Eeuwige Striidvelden
5. Verborgen Stad
6. Ravenklauw
7. Fier
8. Letum

Gardarika Musikk, украінская кантора, што спэцыялізуецца на выданьні музыкі, галоўным чынам, pagan black скіраванасьці, упэўнена пашырае свае межы ў геаграфічным пляне: аўтарам дадзенага дыску выступае гурт ажно з Галяндыі. Як паведамляе сайт лэйблу, гэтая плытка – чацьверы альбом каманды, аднак, прызнаюся, што я HELLEBAARD аніколі раней ня чуў.
Чым жа парадуюць нас галяндцы? Парадуць надзвычай добрым чорным мэталам, я вам скажу. Альбом адкрвае песенька, ідэнтычная назве гурта, “Hellebaard”, то бок – “Алебарда”, і ўжо зь першых нотаў у айчыннага слухача, знаёмага з усходнеэўрапейскай сцэнай ўзьнікне дакладная асацыяцыя – GRAVELAND. Ня ведаю, ці то галяндзкі дуэт ёсьць прыхільнікамі творчасьці Робэрта Даркэна, ці то, магчыма, якога іншага выканаўцы з падобным гучаньнем, але для беларускіх чытачоў паралель з палякамі будзе, так ці інакш, найлепшай.
Маршавая аснова музыкі, ваяўнічы голас, што, прыватна мне, нагадаў манеру сьпеву Пэтэра са SKYFORGER – анічога звышновага вы тут не пачуеце, аднак, альбом вымагае станоўчых адзнак, як на маю думку. Матывы некаторых песень западуць у сьвядомасьць адразу ж пасьля першага праслухоўваньня, больш за тое, гэты дыск, у адрозьненьне ад многіх, што выдаюцца апошнім часам на постсавецкай прасторы, вам захочацца паслухаць яшчэ і яшчэ. Лірыка на галяндзкай мове выдатна дапасуецца да гучаньня музыкі, хаця, як для мяне, прыватна, зьяўляецца абсалютна незразумелай. Так што, калі вы – прыхільнік паўночнаэўрапейскага паганскага блэку, і вам у краме трапіцца ў рукі гэтая плытка, можаце сьмела папаўняць ёй сваю калекыцю – добры і якасны ўзор стылю. Рэкамэндую.

8/10
Lutavit.

0 каментароў

Каб пакінуць каментар