avatar

Фестываль «Рок па вакацыях»
Апублікавана у Рэпартажы

69 Фота
image
Пятніца трынаццатага… Нехта сядзiць дома, бо лiчыць гэты дзень вядзьмацкiм: раптам чорны кот цi кошка дарогу перабяжыць — бяда… Але многiя нiчога не баяцца ў гэтым жыццi: ходзяць на рок- фестывалi i адрываюцца на поўны моц. Дарэчы, у сталічным клубе «Цэнтр» 13 верасня прайшоў фестываль «Рок па вакацыях», якi адзначыў дваццацi гадовы юбiлей. Удзел у фестывалi прымалi N.R.M, «Крама», Neuro Dubel, «Палац», Кася Камоцкая, Re1ikt, Naka, «Зьмяя», Вадзім Курылёў. Вядоўцам гэтай знамянальнай падзеі быў Аляксандр Памідораў, якi не даваў сумаваць натоўпу людзей, якi запоўніў канцэртную залу. Было вельмі «горача» ва ўсім сэнсе: хтосьці ратаваўся півам, а некаторыя — грэйпфрутавым сокам… Асабліва здзівілі i ўразілі сваім выступленнем наступныя гурты: NRM, «Крама», Neuro Dubel. Гледачы шчыра віталі музыкаў.

Першым на сцэне з'явіўся гурт «Палац». За свой дваццацiгадовы перыяд творчай дзейнасцi гурт ўдзельнічаў у многіх фестывалях краін Еўропы і СНД. Гурт «Палац» з'яўляецца пачынальнікам стылю фолк-модэрн (folk-modern) магістральнага накірунку. Лідару гурта Алегу Хаменку ўдалося захапiць сваiмi песнямi шматлiкiх гасцей фестывалю. У цэлым, гурт змог разварушыць гукамі беларускага аўтэнтычнага фальклору шматлiкiх людзей. Падтрымка была на ўзроўні, бо зала бурнымi апладысментамi cустракала iх.

Наступным выступаў гурт Nakа — цікавы дуэт з дзвюх дзяўчын Анастасіі Шпакоўскай (вакал), Ірыны Кліменка (фартэпіяна). Іх музыка сапраўдны ўзор таго, як трэба рабіць сваю справу — якасна і з душой. Музыка ўспрымалася то лёгка, то складана — вельмі пачуццёвая жаночая лiрыка.

Гурт «Крама» літаральна ўзарваў залу энергетыкай і сiлай рок-н-рольнага духу! Асалоду ад iх музыкi немагчыма перадаць славамi. Лідар гурта «Крама» Ігар Варашкевіч вельмi файна граў на губным гармонiку, што надавала iм асаблiвы, непаўторны каларыт. Пад песню «Гэй, там, налiвай».Усе ўвайшлi ў такое захапленне, што сталi не толькi спяваць разам з гуртом, а i танчыць, танчыць, танчыць. Малайцы! Выступілі выдатна.

Чацвёртай па спісе праграмы фестывалю выйшла на сцэну Кася Камоцкая, па сутнасці, першая беларускай rock-woman, лідар легендарнага гурта «Новае неба». Кася Камоцкая двойчы была рок-князёўнай. Вельмі кранула ў яе выкананні песня «Белая Лебядзь». Ярка і з душою была выканана песня «Мая краіна». На сцэне Кася Камоцкая спявала вельмі шчыра і задушэўна.

Наступным на сцэну выйшаў гурт Re1ikt cа сваiм своеасаблівым гучаннем, у якiм паспяхова спалучаюцца розныя музычныя стылі, гэтакая эклектыка-progressive, post rock, art rock, alternative і іншых стыляў. Яны ўнеслі ў фестываль свежую нотку. Малады гурт, але якi экспрэсiўны!.. Рэакцыя на іх у зале была адпаведная- слэм і яркія эмоцыі.

Шостым па спісе праграмы фестывалю выйшаў на сцэну Вадзім Курылёў. Ён выхадзец з суседняй краiны Расii, з'яўляецца рок-музыкам, лідарам гурта «Электрычныя Партызаны». У мінулым ён вядомы як удзельнік гурта «ДДТ». Вадзім Курылёў, выконваючы свае песні, трымаўся на cцэне ўпэўнена і свабодна. А як ён цудоўна iграў на гітары проста казка! Адчуваўся прафесійны ўзровень выканання. Аб такіх людзях, як ён, кажуць, што яны дыхаюць музыкай.

Ажыўленне ў зале адбылося са з'яўленнем гурта Neuro Dubel. Вось тут быў сапраўдны адрыў! Трэш i угар у лепшых традыцыях! Публіка нiбы звар'яцела пад энергiчныя і шчырыя песні Аляксандра Кулінковіча. Гэта трэба было не толькi чуць, але i бачыць- усю моц і адначасова душэўнасць. Атмасфера ў зале атрымалася нейкая сяброўская, бо такая музыка аб'ядноўвае ўсiх i дае адчуванне асаблівага смаку жыцця «тут і цяпер». На маю думку, iх выступленне было адным з найлепшых.

Наступным на cцэне з'явіўся гурт Зьмяя. Добра яны граюць альтэрнатыўны рок з жаночым вакалом. Вакалicтка Зоя Сахончык, акрамя прыгожага, магутнага жаночага вакалу, прыкоўвала позiркi мужчын i сваёй прыгажосцю. Адыгралі, як кажуць на адным подыху, пакінуўшы пра сябе прыемныя ўражанні.

Адчуваецца буйны эмацыйны напал на фестывалi. Культавы беларускi гурт NRM выходзіць на cцэну. Сустракаюць гурт паклоннiкi іх творчасці ўзнёсла і гучна. Гуртом былі выкананы ўсім вядомыя кампазіцыі, а таксама былi выкананы дзве песні з новага альбома. Апошняя песня «пра каханне», выклікала найбольшы ўсплёск эмоцый. Усе дружна спявалi яе, а таксама i танчылi.

Што яшчэ дадаць? Фестываль прайшоў паспяхова. Кожны гурт унёс у яго нешта сваё адметнае, самабытнае. I нягледзячы на тое, што часам фестывалi прыпадаюць на 13 пятнiцу, хацелася каб людзi не баялiся розных забабонаў, а смела i з упэўненнасцю далучалicя да высокага i прыгожага да мастацтва –беларускай рок-культуры.

Рэпартаж падрыхтавала: Настасся Пеўнева (-Вена-Rе-ятна-)
Фота: Дзiяна Рудакова ( Norge )

69 выяў

0 каментароў

Каб пакінуць каментар