avatar

ЗаP.L.A.N.аваны мэлядызм «Карлы-Марлы»
Апублікавана у Навіны

Ходнікавая зона вуліцы Карла Маркса ў Менску ўсё больш імпэтна набірае
папулярнасьць. Акрамя майстроў жывапісу й цыркавога мастацтва там можна
рэґулярна паслухаць і сапраўдных лідэраў беларускага року,
наймаднейшыя гурты сучаснасьці. Ужо выступалі там папулярныя
«МутнаеВока», «Re1ikt», «Recha», малады гурт мэдыевальнай музыкі
«Тутэйшыя» ды шмат іншых калектываў.

У бліжэйшыя выходныя (нядзеля, 9 верасьня) гасьцей Сьвята горада чакае сустрэча з мэлядычнымі песьнямі гурта «P.L.A.N.» пад адкрытым небам.

Лідэра калектыву Андрэя Плясанава рок-крытыкі невыпадкова называюць
лепшым мэлядыстам пасьля Мулявіна. А шэсць альбомаў калектыва (і
блюз-рок, і unplugged) акрамя тых чароўных і надзённых песень
дэманструюць і іншыя таленты Плясанава. Ён жа яшчэ й калекцыянэр
аванґарднага жывапісу, арґанізатар першых рок-фэстываляў і мастацкіх
выставаў, а сам як мастак трапіў у галяндзкі кніжны фаліянт «1001
лепшы мастацкі позірк на сьвет ХХ ст.». Карціны, бодзі-арт, кнігі,
сусьветныя выставы трапілі ў мультымэдыйныя бонусы тых кампакт-дыскаў.
Ёсць на дысках і кліпы Андрэя Плясанава, бо паводле адукацыі ён
прафэсыйны рэжысэр.

У праґраме нядзельнага выступу артыста прагучаць ня толькі лепшыя
песьні гурта «P.L.A.N.» з тых шасьці альбомаў, але й неапублікаваныя
яшчэ творы. Паралельна будзе праходзіць аўтоґраф-сэсія самога
Плясанава і музычных крытыкаў Вітаўта Мартыненкі ды Анатоля Мяльґуя, у
кнігах каторых («222 альбомы беларускага рока», «Rock on-line») шырока
прадстаўлена творчасць гурта «P.L.A.N.».

Заплянаваны час выступу «P.L.A.N.» на deptaku Карла Маркса – з 18.30
да 19.30, 9 верасьня, нядзеля.

Кастусь БАЕШКА.

  • 1891

0 каментароў

Каб пакінуць каментар