Новы клуб Re:Public - надзея беларускай сцэны

Апублікавана 16 верасьня 2011, 20:05 у Навіны

Крызіснае становішча нашай краіны дало адбітак на андэграундавую музычную сферу: рэфармаваліся некалькі пляцовак, перайшлі на больш прыбытковую дзейнасць, закрыўся топавы клуб «Рэактар», кошты ўсё больш пужаюць аматараў жывога гуку… І вось у такіх умовах нараджаецца новае імя — клуб RE:PUBLIC.
Паводле інтэрв'ю арт-дырэктара Максіма Старцава становіцца вядомым шэраг цікавых фактаў, прыведзеных ніжэй:

Адразу трэба зазначыць, што мэта новага клуба — не толькі замяніць Рэактар, лёс якога невядомы (акрамя таго, што ён больш не будзе канцэртным ), але і пераўзысці гэты сапраўдны бастыён беларускай сцэны (які з'яўляўся для шэрага замежных гуртоў катэгарычнай умовай прыезду). Тым не менш, адміністрацыя мэтанакіравана, і бачыць, як у будучым словазлучэнне «жывы канцэрт» будзе асэнсоўвацца з клубам Re:Public (дарэчы, і назва сімвалічная).

Максім зазначае, што ўсё будзе максімальна рабіцца для гледачоў: продаж квіткоў праз інтэрнэт, дэмакрытычныя кошты ў бары. Ёсць нават думка тлумачыць грашовы эквівалент квітка рэальнымі таварамі (цытата: «Мы наведалі блінную тут побач, ды зразумелі, што ўдваіх паелі на кошт білета нядрэннага гурта, які плануем запрасіць… Вось і прыйшло меркаванне, што можна і пражыць без двух бліноў, затое трапіць на ахвігенны канцэрт у файны клуб з прыемнымі коштамі на бары»). «Мы не плануем нажывацца на гледачах: мы проста жадаем працаваць ды атрымліваць задавальненне. У нас імкненне развіваць родную сцэну, прывазіць гурты з бліжняга замежжа, але тых, каго ў нас яшчэ ніколі не было. Таму і плануецца шмат канцэртаў. Акрамя заробку грошаў, мы жадаем займацца, як бы яно пафасна не гучала, але культурнай асветай.»

«Два танцполы, два бары, маналітная сцэна, грымёрка для музыкантаў. Кінапрагляды ўноч (кінаклуб на другім паверсе), ніякіх гапацек пад фармат вечарын… Ліцэнзія дазваляе шмат».

Рамонтныя работы амаль скончаны, і першы канцэрт у новым клубе адбудзецца 17 верасня. Знаходзіцца гэтае цудоўнае месца па вуліцы Прытыцкага, 62. Калі што, на месцы былога «Step».
Мы з гонарам дадаем Re:Public на мапу і жадаем вялікіх поспехаў яго кіраўніцтву!

53.9076951;27.4579373;вул. Прытыцкага, 62