Новы сінгл ад "Багны"

Апублікавана 30 красавіка 2013, 15:05 у Навіны

Сёньня ўбачыў сьвет сінгл культавага гурта «Багна», чый легендарны кліп «Гара Багоў» («Алімп») у агульнай складанасьці пабачыла больш за 3 мільёны карыстальнікаў ютуба, які абмяркоўвалі ў перадачах «+100500», «Очень плохая музыка», «Бабкины яйца» ды інш.

Расказваюць Мікалай «Крот» Кротаў (Берсеркер) і Андрэй АнДрон (Валера):
«Песьня «Вожак» на героіка-пафасны манер, аналагічны нашаму першаму мега-хіту «Гара Багоў», мае пачатак сваёй гісторыі яшчэ ў 2007 годзе, калі яе выконваў гурт «Пан Крот», але ад яе тады адмовіліся з-за нестыкоўкі стылю песьні і стылю калектыву. І вось цяпер яна будзе першай цаглінай у дэбютным альбоме гурта «Багна».

Выхадам песьні мы паказваем, што «Багна» гатовая зноў зьбіраць стадыёны. Адраджэньне гурта было намечана ў 2011 годзе, калі вельмі шмат ўвагі было нададзена нашаму мега-кліпу 2004 года. Адыграўшы ў той перыяд некалькі канцэртаў, мы зразумелi, што запіс новага мега-хіта не атрымаецца фінансаваць і сышлі ў працяглы запой. Але аднойчы вырашылі, што ўсё ж трэба, і пайшлі ў пераход, каб сабраць «са сьвету па нітцы».

У адзін зь дзён у пераходзе да нас падышоў Яўген з гуртоў «Aillion» ды «Navigator». Ён нас пазнаў і прапанаваў сваю дапамогу. І літаральна праз тыдзень мы ехалі на цягніку ў Нямеччыну на студыю «Teldex Studio» для запісу новага хіта, які зараз і прэзентуем.

Падчас запісу мы пазнаёміліся зь Вялікім Ангусам Янгам, які запісаў гітару для трэцяй часткі другога куплету. Таксама на студыі мы пазнаёміліся з былым драмерам «Megadeth» Нікам Менц, які спецыяльна прыязджаў для перайманьня нашага вопыту працы з «air drums». Зьвядзеньне праходзіла ў Фінляндыі ў Міка Карміла на Sonic Pump Studios.

Вось зараз мы прэзентуем Вам песьню «Вожак» і ў той жа час езьдзім па сьвеце дзеля выбару месца для здымак будучага мега-кліпа. Так што ў хуткім часе пабачыце. I калі знойдзем спонсара, то пачуеце паўнафарматны наш альбом, матэрыял якога ўжо пыліцца на паліцы, чакаючы стрэлу. А калі хочаце бачыць наш культавы тру-мІтал гурт у сваім горадзе, то зьвяртайцеся, і мы зь вялікім задавальненьнем у вас выступім.

А пакуль мы да Вас едзем, слухайце і атрымлівайце асалоду ад гурта «Багна» — песьня «Вожак»».