avatar

KrotParty 28.02.13
Апублікавана у Рэпартажы

28-га лютага прайшоў канцэрт KrotPаrty у менскім клубе Салтайм, які адчыніў свае дзьверы перад музычнымі гуртамі і простымі слухачамі. Апошніх, на вялікі жаль, было няшмат, мабыць, таму што была сярэдзіна тыдня. Тым вечарам выступалі чатыры гурты, першапачаткова іх павінна было быць шэсьць, але засталіся самыя трывалыя. Саўндчэк, і вось ужо першы гурт на сцэне.

Першым разаграваў народ слуцкі хардкор гурт Fatal Twist. Граць першымі заўсёды ня вельмі прыемна, хлопцы хваляваліся, да і выглядалі яны самымі маладымі з усіх прысутных. Мабыць, з-за хваляваньня і нястачы вопыту выступ выйшаў дзесьці скамканым. Шмат пафасу ў словах са сцэны, якія на мой погляд былі зусім непатрэбнымі. У хлопцаў ёсьць патэнцыял, і свайго слухача яны абявязкова знойдуць. Больш упэўненасьці і працы дапамогуць расьці далей. На вялікі жаль, зусім не было чуваць басіста. Некалькі брэйкдаўнаў і рыфаў мне спадабалася.

Другімі на сцэну падняліся маладзечанскія трэшары DSF. Гэты гурт паказаў прыклад сыгранасьці і поўнага узаемаразуменьня на сцэне. Нягледзячы на некаторыя праблемы з барабаннай устаноўкай, гурт вельмі добра паказаў сябе. Музыкай DSF нагадвалі знакамітую Metallica праклада 80-х гадоў ды часу Black Album, але гурт безумоўна маў сваю адметнасьць. Пасьля некальіх угарных трэкаў музыкі вырашылі выканаць лірычную песьню, але потым працягнулі сваё малацілава. Адной з апошніх песень быў кавер на «Enter Sandman», пасьля якога стала канчаткова ясна, што бацька Хэт жывы! Цяжкія ды прыемныя рыфы гурта разам з хуткаснымі сола спадабаліся ня толькі мне, але і многім з прысутных.

DSF добра разагрэлі слухачоў, і пасьля іх пачалі граць наваполацкія дэзкоршчыкі DeadMemoriesOfPain. Многім гледачам гэты гурт прыйшоўся даспадобы, і на танцпляцы таксама ўсе актывізаваліся. Мне вельмі спадабаўся драмер гэтага гурта, які ў перапынках паміж трэкамі яшчэ пасьпяваў граць ролю франтмэна. Цалкам музыка была неблагая, але я далёка не фанат такога музычнага стылю, таму успрымаць выступ было цяжкавата. Хлопцы выглядалі сыгранымі і крыху злымі, што ня скажаш пра вакаліста, які увесь выступ прыемна усьміхаўся. Многа каму выступ гурта DeadMemoriesOfPain прыйшоўся даспадобы, але я быў не сярод гэтых людзей.

І апошнімі на сцэну падняліся менскія металкоршчыкі Dead Mason. Бяз доўгіх уступаў яны пачалі сваю праграму. Музыка гурта вельмі цікавая, гэта як адказ металкору амерыканскай школы зь Беларусі. Прыемныя рыфы ды сола, ад некаторых чуўся гук олдскулу, добрая зьвязка гроўла і чыстага вакала. Усё выйшла добра, дзесьці цяжка, дзесьці меладычна, хлопцы падабралі добры баланс паміж цяжкасьцю і меладычнасьцю гучаньня. Падчас выступу тыя, каму не хапіла адрыву, падцягнуліся да сцэны і напасьледак ажывілі клуб. Было прымна слухаць якасны і адрэпетаваны матэрыял, нават тое, што калі кропка кіпеньня знаходзілася вельмі высока, ды ад гэтага раптам выпадкова выключыліся камбары, выглядала гэтае бы жарт.

Пэўныя праблемы ўсё ж не змаглі перашкодзіць аніводнаму гурту. Канцэрт выйшаў вельмі цікавым, людзей было няшмат, і таму гурты падтрымвалі адзін аднаго на танцпляцы. Вось канцэрт скончыўся, і гледачы/слухачы галасуюць за гурты. Наступае час абвяшчэньня вынікаў. Спачатку па вырашэньні арганізатараў на наступны канцэрт праходзіць гурт Dead Mason, затым хутка падлічваюцца галасы слухачоў, і выходзіць, што і слухачы выбіраюць Dead Mason. Гурт заслужыў гэтае, хлопцы выступілі крыху лепей за іншых. Арганізатыры хутка выбралі другі гурт, які таксама праходзіць на наступны канцэрт, ім апынуўся DSF, таксама справядлівае рашэньне. Да сустрэчы на наступных мерапрыемствах Крот-рок-Фэста.

0 каментароў

Каб пакінуць каментар