"Сакральная геаграфія Беларусі" - кніга былых паданняў для падарожжаў сучасных рамантыкаў
Апублікавана
у
Беларусь
Калі вы любіце легенды, паданні і фальклор роднай краіны, калі вы не прадстаўляеце сабе жыцця без падарожжа па гарадах, вёсках, курганах, азёрах і гд., і калі з кожным днём хочаце даведвацца пра ўсё цікавае з Беларуссю звязанае — прапаную азнаёміцца (тым, хто яшчэ не азнаёміўся, зразумела) з цудоўнай кнігай пад цікавай назвай «Сакральная геаграфія Беларусі».
А можа вас цікавіць, чаму чорт Шайтан утварыў "Чортаву гару" менавіта каля вёскі, у якой нарадзілася ваша маці; ці чаму камень завуць Рымшавым, а міфічныя "горы" з міфічнымі скарбамі — шведскімі ці французскімі? Людміла Дучыц (археолаг) і Ірына Клімковіч (фалькларыст) задаволяць вашую цікавасць.
Азёры, камяні, дарогі, крыжы, крыніцы — усё мае сакральны сэнс. "Гэтая кніга — кажа нам прадмова ? адна з першых спробаў у нашай краіне сістэматычна асэнсаваць традыцыйную і культурную спадчыну беларусаў, захаваную нашымі продкамі ў легендах і паданнях, геаграфічных назвах, багатым фальклорным матэрыяле". І я з гэтым пагаджуся ў поўнай меры.
Кніга чытаецца не проста лёгка, а вельмі лёгка. Да кожнага раздзела кнігі пададзены спіс літаратуры, што робіць яе яшчэ і досыць навуковай. Яна напісана так, што вызывае незвычайную цікавасць на кожнай старонцы да кожнага аб'екта, які раней нам, гарадскім жыхарам, мог зусім не падацца такім ужо таямнічым. Пэўны час яна нават была маёй настольнай кнігай. Па «Сакральнай геаграфіі...», што яшчэ больш цікава, можна ладзіць уласныя падарожжы вялікай прыемнай кампаніяй, таму што:
1. тут прысутнічае паказальнік «Народныя назвы археалагічных і сакральных ландшафтных аб'ектаў Беларусі»;
2. ёсць дэталёвы геаграфічны паказальнік, што дадае выданню большую грунтоўнасць, узводзіць яго ў ранг вартага дапаможніка ў вывучэнні гісторыі, геаграфіі і нават літаратуры.
Таму, усім раю пачытаць, а потым адарваць свой зад ад камп'ютара і паехаць па "Чортавай дарозе" да "Валатовай гары" і "Чарадзейнага возера", на месцы якога быў міфічны горад… А там і археолагам стаць недалёка )))
6 каментароў