Крытыка РПЦ: погляд з правага боку =)
Апублікавана
у
Блог by Horn
Мабыць, я памыляюся, бо няшмат ведаю, але выкажу назіраньне.Праблема з Масквой і РПЦ, сярод іншага, у тым, што ў іх вера падпарадкавана палітыцы. У той час як рэлігія паводле ўзроўню абстракцыі стаіць вышэй за палітыку, і калі ў пабудове грамадства мы імкнёмся пераймаць будову прыроды і наогул сьвету, то палітыка павінна падпарадкоўвацца рэлігіі / сьветагляду, а эканоміка — палітыцы.
Тады маскоўскі перакрут як асобны этап упісваецца ў зьяву, якую, у залежнасьці ад кропкі гледжаньня і часоў, можна назваць гуманізмам, сатанізмам, марксізмам, камунізмам, трацкізмам, перманентнай рэвалюцыяй, эгалітарызмам, няспынным наступам хаосу (усё гэта адно і тое).
РПЦ, несучы сваю веру, несла і царкоўнаславянскую / рускую мову і такім чынам цягнула тутэйшых да рускай культуры і маскоўскага падпарадкаваньня, а павінна была б цягнуць іх толькі да бога ў сваім разуменьні. Як я чуў, паводле праваслаўных канонаў — яшчэ бізантыйскіх — службы павінны весьціся на мове мясцовага насельніцтва. А на якой мове вяліся службы праваслаўнай царквы (і ў прыватнасці РПЦ) ў этнаграфічных межах Беларусі ў часы ВКЛ, потым РП, потым РІ? Можна ўзгадаць тут і вядомае абвінавачваньне маскоўскай царквы з боку Канстантынопаля ў тым, што яна грашыць чымсьці накшталт "нацыянал-сепаратызму".
Зноў жа, калі сапраўды можна казаць пра згаданы вышэй перакрут, то зь ім добра стасуецца некаторае… якабінства крамлёўскіх і пракрамлёўскіх ідэолагаў, у т.л. "заходнерусістаў" — якабінства, прынамсі, у адносінах да Беларусі і Ўкраіны. Маецца на ўвазе, што яны прапануюць не імперскае аб'яднаньне розных, а ўніфікацыю, сціраньне асаблівасьцяў паводле ўзору буржуазных "дзяржаў-нацый", а таксама помсьлівую нянавісьць да суседзяў (напрыклад, палякаў ды прыбалтаў) паводле прыкладна таго ж узору. Таму мне нешта ня хочацца называць заходнерусістаў "таксама традыцыяналістамі", як гэта зрабіў Аляксандр Шпакоўскі на круглым стале беларускіх палітычных сілаў пад назвай «Сцэнараваньне агульнай будучыні».
Магчыма, я занадта вольна карыстаюся паняткамі, выбачайце. Як раптам будуць удакладненьні і заўвагі, выказвайцеся.
(Паўтор з kryczny-horn.livejournal.com/2004.html)
0 каментароў