Kliatva viernasci ← Like a Gossamer

«Kliatva viernasci» — міжнародны арт-праект, які з'явіўся на стыку трох відаў мастацтва: сучаснай авангарднай музыкі, графікі і літаратуры.

«У альбоме слухач знаёміцца з маладым этнографам-фалькларыстам, які вандруе па Беларусі, гутарыць з людзьмі і запісвае іх апавяданні, — кажа лідэр Like a Gossamer Дзяніс Голін. — Гэта канцэптуальны музальбом, створаны паводле беларускіх легендаў і паданняў. Ён працягвае рамантычную традыцыю, закладзеную Янам Баршчэўскім у «Шляхціцы Завальні» і ўжо ў наш час развітую Уладзімірам Караткевічам».

У аснове літаратурнага складніка альбома ляжаць не толькі клапатліва сабраныя ў навуковых і мастацкіх крыніцах малавядомыя легенды Беларусі, паэтычная інтэрпрэтацыя якіх належыць пяру паэткі Алены Жукавай, але таксама і біяграфіі выбітных дзеячаў нашай гісторыі (Усяслава Чарадзея, Міхала Клеафаса Агінскага ды іншых), чые жыцці сталі прыкладам служэння роднай зямлі і натхнілі музыкаў.

Візуальным складнікам «Клятвы вернасці» з'яўляецца графічны цыкл, адмыслова створаны ў арыгінальнай тэхніцы манатыпіі мастачкай з Берліна Катарынай Філіст. Такім чынам буклет дыска Like a Gossamer ператварыўся ў паўнавартасны мастацка-паэтычны альбом на 24 старонкі.

Унікальны і аўдыяскладнік «Клятвы вернасці».

Альбом уяўляе сабой музычны цыкл з 20 кампазіцый, у якім песні арганічна спалучаюцца з такой формай сучаснай электраакустычнай музыкі як soundscape composition.

Тэхніка soundscape composition характарызуецца наяўнасцю ў музычным палатне пазнавальных гукаў навакольнага асяроддзя і кантэкстаў (русалка, якая жыве ў возеры Свіцязь; узрушаны натоўп на плошчы старажытнага Полацка; боты жандараў, што грукаюць па віленскім бруку), якія будзяць уяўленне слухача і выклікаюць у яго ўспаміны ды асацыяцыі. Іх для альбома стварыў удзельнік менскага праекта Favourite Mirror Арцём Бусел.

Трэкі ахопліваюць шырокі спектр стыляў: андэрграўндная эстэтыка аб’ядноўвае ў альбоме progressive metal, medieval, folk, класіку і джаз.

Абрамленнем цыклу сталі беларускія народныя песні: зімовая «Ой, стаіць Бяроза» і восеньская «Зашумела дубровачка», выкананыя ў традыцыйнай манеры.
Дыск выйшаў 28 студзеня 2014 года.

Трэкліст

1. Oj, staić biaroza.
2. Zimovym šliacham.
3. Kraj rasamach, rusalak i čarciej.
4. Vandroŭka pieršaja.
5. Sviciaź.
6. Viĺnia.
7. Sviatajanskija mury
8. Vandroŭka druhaja.
9. Kliatva viernasci.
10. Vandroŭka treciaja.
11. Čaradziej.
12. Vandroŭka čacviortaja.
13. Zakliataja hara.
14. Zaliessie.
15. Niepačuty palanez.
16. Vandroŭka piataja.
17. Šviedy.
18. Poliem.
19. Daroha.
20. Zašumiela dubrovačka.